د پي ټي آئي لانګ مارچ په خاطر اسلام آباد کښې د سکیورټي انتظاماتو په لړ کښې د حکومت لخوا د کروړونو روپو د يوميه اخراجاتو تفصيلات مخې ته راغلې،د مجموعي سکیورټي خرچه د یو ارب روپو نه زیاته ښودلي شوې ، ولې د مارچ تر څلورم اکتوبر پورې ځنډېدو باوجود اسلام آباد کښې کنټینرې او اضافي پولیس نفري لا هم موجوده ده ۔
اسلام آباد کښې د سکیورټي انتظاماتو لپاره پنځلس سوه پنځوس کنټینرې لګولي شوي، د دغو کنټینرو يوميه کرایه څلور کروړه پنځه شپېتۀ لکه روپۍ ده، چې د يوې هفتي کرايه یې دوه دېرش کروړه پنځه پنځوس لکه روپۍ جوړېږي ۔
اسلام آباد پولیس د سکیورټي انتظاماتو لپاره دوه اتیا کروړه روپۍ غوښتې دي، په داسې حال کښې چې د مجموعي سکیورټي خرچ د یو ارب روپو نه د زیاتېدو امکان ښودلې شویدې ۔
د پنجاب نه شپاړس زره پولیس اهلکار غوښتلي شوي ، د پنجاب پولیس د اهلکارو د خوراک لپاره ورځنې خرڅ شپږ نوي لکه روپۍ دې،،کوم چې د یوې هفتې شپږ کروړه دوه اوویا لکه روپۍ جوړيږي، د سندھ پولیس د خوراک لپاره د دوه هفتو خرچ یو کروړ اتۀ شپېته لکه روپۍ ښودل شویدې ۔
د سکیورټي انتظاماتو لپاره اوویا کوسټرې او دېرش ډبل کیبن ګاډي هم په کرایه اخستل شوي، د اوویا کوسټرو ورځنې کرایه لس لکه پنځوس زره او د دېرش ډبل کیبن ګاډو ورځنې کرایه درې لکه روپۍ ده ۔
