نن ټوله نړۍ کښې د حجاب عالمي ورځ نماځلې کيږي ،دا ورځ يوازې د يو لباس يا پردې خبره نۀ ده بلکې دا د ښځې د عزت ، پيژنګلو او د خپل اختيار نښه ده، حجاب د ښځې د حيا، وقار او ايمان ښکلې علامت دې،
له بده مرغه زمونږ په ټولنه کښې ډير خلک حجاب يوازې د ظاهره شي په توګه ګوري ،خو حقيقت دا دې چې حجاب يو مکمل سوچ او د ژوند طريقه ده ۔دا ښځه نۀ بندوي ،بلکې هغې ته عزت او احترام ورکوي ،حجاب دا پيغام ورکوي چې ښځه يوازې د ظاهري ښکلا لپاره نه ده ، د هغې اصل پيژندنه هغې د کردار عقل او قابليت دې۔
نن سبا د فتنې په ماحول کښې حجاب يو مضبوط غږ دې چې وائي ښځه يو مکمل انسان دې ، د هغې عزت بايد د هغې د خوښې او اصولو مطابق وشي ۔
حجاب يوازې مذهبي فرض نۀ دې بلکې ډيرې ښځې د سکون ، تحفظ او اعتماد لپاره هم حجاب کوي ، دا ښځې ته دا احساس ورکوي چې هغۀ د خپل ژوند فيصله په خپله کولې شي او د خپل عزت لپاره د چا اجازت ته ضرورت نۀ لري ۔
په نړۍ کښې ډيرې حجاب کونکي ښځې تعليم ، ميډيا ، سياست ، طب او نورو شعبو کښې ډير ښۀ کار کوي ۔دا ثابته ده چې حجاب د پرمختګ په لاره کښي خنډ نۀ دې بلکې د اعتماد او پيژنګلو طاقت دې ۔
حجاب کونکي ښځه کمزورے نۀ ده بلکې دا ښائي چې هغه په خپلو اصولو ولاړه ده ، عزت يوازې په ظاهري ازادۍ کښې نۀ دې بلکې په حان دارۍ او ښه کردار کښې دې ، حجاب د ښځې لپاره يو حفاظت هم دې او يو روحاني طاقت هم دې ۔
نن د حجا ورځ مونږ ته دا سبق راکوي چې د ښځې د انتخاب احترام پکار دې ۔ کومه ښځه چې حجاب کوي هغه هم د عزت وړ ده او کومه چې نۀ کوي هغه هم د عزت وړ ده ۔اصل خبره نيت ، کردار او انسانيت دې ، د لباس په بنياد په چا تنقيد کول سم کار نۀ دې ۔
نن مونږ ته پکار ده چې حجاب صرف رسم ونه ګنړو، بلکې دا دښځې د وقار او عزت يو ښکلې اظهار وبولو۔ حجاب د ښځې کمزوري نه د هغې طاقت ،پيژندنه او د اصولو نښۀ ده ۔
د حجاب ورځې پيغام هم دا دې چې ښځې ته عزت ورکړې شي ،د هغې فيصله ومنلې شي او په ټولنه کښې ورته احترام ورکړې شي ۔
