پيښور هائيکورټ د اليکشن کميشن آف پاکستان طرف نه خېبر پښتونخوا اسمبلۍ کښې د مخصوص شستونو په حواله جاري شوې اعلاميه کالعدم ګرځولې او په دې نشستونو منتخب اراکين ئې د حلف اخستو نه هم اودرولي دي، عدالت اليکشن کميشن ته هدايت کړې چې د مخصوص نشستونو تقسيم دې لس ورځو کښې دوباره اوکړي ۔
پيښور هائيکورټ خيبر پښتونخوا اسمبلۍ کښې د مخصوص نشستونو تقسيم خلاف د مسلم ليګ ن په درخواست محفوظ کړې شوې فيصله اورولې ده، عدالت د مسلم ليګ ن درخواست سماعت لپاره منظور کړې او د اليکشن کميشن اعلاميه ئې کالعدم ګرځولې ده ۔
عدالت خپله فيصله کښې اليکشن کميشن آف پاکستان ته هدايت کړې چې د مخصوص نشستونو تقسيم دې دوباره اوکړي، دې لړ کښې عدالت مخصوص نشستونو باندې منتخب اراکين هم د حلف اخستو نه اودرولي دي ۔
د پيښور هائيکورټ لخوا جاري دوه صفحاتو باندې مشتمل فيصله جسټس ارشد علي ليکلې ، چې پکښې د اليکشن کميشن د تقسيم اعلاميه کالعدم ګرځولې شويده ۔
عدالت خپله فيصله کښې وئيلي دي چې د اليکشن کميشن د دوه ويشتمې فرورۍ دوه زره څليريشتم اعلاميه غيرقانوني او غير آئيني ده، دغه اعلاميه د آئين آرټيکل 106 خلاف ورزي ده، دا فيصله د اليکشن ايکټ 2017 رول 92 هم خلاف ده ۔
فيصله کښې اليکشن کميشن ته حکم شوې چې د زنانؤ او غير مسلمو د مخصوص نشستونو په حواله دې د دوباره تقسيم فيصله لس ورځو کښې دننه يقيني کړې شي ، او دا چې د آئين او قانون مطابق دې د مخصوص نشستونو تقسيم دوباره اوکړي ۔
