په اتمه فرورۍ د عام انتخاباتو يو کال پوره کيدو باندې تحريک انصاف توره ورځ مانځلې ، دې سلسله کښې صوابۍ کښې د يو لوئې جلسې اهتمام شوې وو
جلسې ته د پي ټي آئي چيئرمين بيرسټر ګوهر ، وزيراعلى خېبرپښتونخوا علي امين ګنډا پور ،د پي ټي آئي صوبائي صدر جنيد اکبر ، اسد قيصر د مجلس وحدت المسليمن مشر علامه راجه ناصرعباس او د پښتونخوا ملي عوامي پارټۍ محمود خان اچکزئي هم وينا کړې ۔
صوابۍ جلسې ته خطاب په وخت پي ټي آئي صوبائي صدر جنيد اکبر وئيلي چې مونږ د ادارو ترمينځ ټکراو نه غواړو ولې دا ځل به مکمل تيارې سره اسلام آباد ته راځو ۔
د پي ټي آئي صوبائي صدر جنيد اکبر اووئيل چې د ملک ادارې زمونږ خپلې ادارې دي او مونږ ادارو سره ټکراؤ نه غواړو ، زۀ دا خبره واضحه کول غواړم چې د ادارو او اولس ترمينځ فاصلې سيوا کيږي د کوم نقصان به ملک ته رسي ۔
جنيد اکبر اووئيل چې د مينډيټ غلا کونکو ته په ډاګه کول غواړم چې تير کال مينډيټ د پي ټي آئي اوو او نن هم د پي ټي آئي دې ۔
وزيراعلي خېبرپښتونخوا علي امين ګنډا پور وينا وه چې مونږ ملک کښې د آئين او قانون بالادستي غواړو ، نظريه چرې هم نه مري او نه ختميدې شي ۔
علي امين ګنډاپور اووئيل چې مينډيټ چور حکومت د فوج او اولس ترمينځ فاصلې سيوا کول غواړي او زۀ حکمرانانو نه مطالبه کوم که چرې تاسو نفرتونه سيوا کوۍ نو د دې نقصان به پاکستان ته رسي ۔
په دې موقع جلسې ته خطاب کښې پي ټي آئي چيئرمين بيرسټر ګوهر اووئيل چې باني پي ټي آئي څو وارې دا واضحه کړې چې د ملک په خاطر مذاکرات کول غواړم، ملک دا وخت د مشکل صورتحال سره مخ دې او د دې ايستو لپاره لاره لټول غواړي ۔
بيرسټرګوهر اووئيل چې باني پي ټي آئي به ډير زر د جيل نه راخلاص شي ولې چې حکومت څومره کيسونه جوړولي شو او څومره حربې ئې استعمالولې شوې هغه ټولې ناکامه شويدي ۔
هغه اووئيل چې د پاکستان سياست د باني پي ټي آئي نه بغير نه شي چليدې، نن ټول ملک کښې اولس احتجاج کوي ، دا محب وطن خلق دي او د دوي آواز اوريدل غواړي ۔
