د سه فريقي ون ډے ټورنامنټ ټرافي نيوزي لينډ په خپل نوم کړې او پاکستان ته ئې په هوم ګراؤنډ په پنځه وکټو شکست ورکړېدې ۔
کراچۍ کښې لوبيدلې ميچ کښې د پاکستان د دوه،سوه ، دري څلويښت رنز هدف نيوزي لينډ شپږ څلويښتم اوور کښې پورا کړې او ميچ ئې ګټلې دې ۔
پاکستان ټاس ګټلې وو او پخپله ئې د بيټنګ فيصله کړې وه، کومه چې صحيح نۀ وه ثابت شوې، د قامي ټيم ټول لوبغاړې آخري اوور کښې دوه سوه، دوه څلويښت رنز باندې آؤټ شوي وو ۔
پاکستان طرف نه محمد رضوان ټولو نه زيات شپږ څلويښت، سلمان علي آغا پنځه څلويښت، طيب طاهر اته ديرش او بابراعظم نهه ويشت رنز جوړ کړي وو ۔
دې نه علاوه فهيم اشرف دوه ويشت، نسيم شاه نورلس ،فخر زمان لس، سعود شکيل اتۀ، خوشدل شاه اووه رنز باندې آؤټ شوي وو ، نيوزي لينډ طرف نه ويل او راورکے څلور، مچل بريس ويل او مچل سينټنر دوه، دوه وکټې په خپل نوم کړې وې ۔
د دوه سوه، دري څلويښت رنز هدف ميلمه ټيم شپږ څلويښتم اوور کښې پنځه وکټو په زيان پورا کړې او ټرافي ئې په خپل نوم کړې ده ، نيوزي لينډ لخوا ټولو نه زيات ډيرل مچل اووه پنځوس ، ټام ليتهم شپږ پنځوس او ډيون کانوے اته څلويښت رنز جوړ کړي وو ۔
پاکستان طرف نه نسيم شاه دوه، شاهين شاه آفريدي، سلمان علي آغا او ابرار احمد يو، يو وکټ په خپل نوم کړې وې ۔
فائنل کښې شاندار څلور وکټې اخستو باندې ويل او راورکے د ميچ بهترين لوبغاړې ګرځولې شويدې، دغه شان سيريز کښې شاندار دوه سوه، نورلس رنز جوړولو باندې سلمان علي آغا ته د ټورنامنټ بهترين لوبغاړي انعام ورکړې شويدې ۔
