خېبرپښتونخوا اسمبلۍ کښې د صوبې امن و امان په حواله تود بحث شوې، د اسمبلۍ اراکينوخېبرپښتونخوا کښې جاري آپريشنونو باندې د تحفظاتو اظهار کړې او ترهه ګروخلاف کاروائيانې ئې رد کړي،صوبائي وزير شکيل احمد تجويز ورکړې چې د صوبې بدامنۍ خلاف دې اسلام آباد، جي ايچ کيو،سپريم کورټ مخې ته دهرنا ورکړې شي، بلخوا عجب ګل تجويز ورکړې چې خېبر پښتونخوا کښې امن بحالۍ معامله دې په ټهيکه ورکړې شي، وزيرقانون آفتاب عالم انکشاف کړې چې د صوبائي حکومت يو هيلي کاپټر تباه شوې،ريسکيو کاروائيانو لپاره دوه هيلي کاپټرې اخستو فيصله شوې ۔
پيښور: د سپیکر بابر سلیم سواتې په صدارت کښې شوې د خېبر پښتونخوا اسمبلۍ اجلاس کښې د جمعیت علما اسلام ف د بنو نه رکن اسمبلي عدنان وزېر وئيلي چي بنو کښې فوجې عملیات شروع کړې شوي ولي ګټورې نتیجې ئې مخې ته نۀ دي راغلې ، لارې هم تړلې شوي، چې لوجې مقامي خلق د پریشانۍ سره مخ شوي ، نیټ ورک معطل شوې ۔
عدنان وزېر وېنا وه چې په بنو کښې د صوبائې حکومت رټ ختم شوې ،د مواصلات او تعېمرات وزېر شکیل احمد اسمبلۍ غونډې ته د وېنا په وخت اووئیل چې بلیم ګیمز په ځائې په صوبه کښې د بدامنۍ خلاف یو ځائې کېدل پکار دې ، ترهه ګر د ملټري اسټیبلشمنټ پیداوار دي ، سکېورټې فورسز ته ترهه ګر په افغانستان کښې په نظر راځي ولې په خېبرپښتونخوا کښي ترهه ګري ورته په نظر نۀ راځي ۔
هغوې ايوان ته تجویز ورکړې چې د اسمبلۍ غړو او سیاسي قیادت له پکار دي چې د بدامنۍ خلاف اسلام آباد ، جې ایچ کیو پنډۍ او سپریم کورټ نه بهر دهرنا ورکړې شي ۔
معاون خصوصی همایون خان اسمبلۍ ته د وېنا په وخت اووئیل چې د هغه په حلقه کښې یو ناکام آپرشن شوې ، چې پکښې درې پولیس اهلکار شهیدان او دولس ژوبل شوي دي ۔
هغوې د آپرشن تحقیقات کولو غوښتنه کړې ، بلخوا د جنوبي وزیرستان نه د پې ټې آئی غړې عجب ګل وزېر تجویز ورکړې چې د صوبې د امن ټهیکه چا له ورکول پکار دي، صوبه کښې د بدامنۍ خلاف عمليات اوکړې شي ۔
د کرک نه د صوبائي اسمبلۍ غړې میجر ریټائرډ سجاد بارکوال اسمبلۍ ته د وېنا په وخت اووئیل چې بنو څلور ورځو نه محاصره کښې دې ، خلق پوزې له راغلي، د بنو په معامله اپیکس کمیټۍ غونډه شوې وه ولې څه قسمه نتيجه ئې مخې ته نۀ ده راغلې ۔
سجاد بارکوال وینا وه چې په خېبر پښتونخوا کښې قبرستان آباد شوې او تابوتونو کاروبار ته وده ترلاسه شوې ، بنو کښې نقل و حرکت بند دې ، نیټ بند دې ، بنو کښې پولیس فعال او مضبوط نۀ کړې شول ۔
سجاد بارکوال زياته کړې چې هغوې د ترهه ګرو خلاف آپريشن خلاف نه دې ،ولې د آپريشن په بهانه خلقو ته تکلیف ورکولو خلاف یو ۔
شفیع الله هم په دیر کښې د آپريشن خلاف آواز پورته کړې او وئیلي دي چې په دیر لوئر کښې یو پنجابې ډي پي او تعېنات کړې شوې دې ۔
بلخوا وزيرقانون آفتاب عالم انکشاف کړې چې د صوبائي حکومت يو هيلي کاپټر تباه شوې،ريسکيو کاروائيانو لپاره دوه هيلي کاپټرې اخستو فيصله شوې ۔
