نائب وزيراعظم او خارجه وزير اسحاق ډار وئيلي دي چې د مکه دفاعي معاهده د سعودي عرب او ترکيه سره د پاکستان د ملګرتيا څرګندونه کوي او دا معاهده د هېڅ يو ملک خلاف نه ده، مارګله ډائيلاګ ته په خپله وينا کښې اسحاق ډار وئيلي چې پاکستان په سيمه کښې امن، استحکام او اقتصادي پرمختګ غواړي، او د نړۍ او سيمې د ګډو مسئلو هواري لپاره د ټولو ملکونو ترمينځ همکاري ضروري ده ۔
اسلام آباد کښې دستورې ته وينا کښې نائب وزيراعظم اسحاق ډار وئيلي د مارګله ډائيلاګ مقصد د نړۍ او سيمې په کچ د پېښو او مسئلو په اړه خبرې کول دي ۔
د هغه په وينا وه چې د نړيوال قوانينو غېرمنصفانه استعمال د ملکونو ترمينځ فرق زياتوي،متحده قامونو پشمول نړيوال ادارو ته خپل کردار د نور ښۀ کولو ضرورت دے ۔
هغۀ زياته کړې چې نوې ټېکنالوجي نوې موقعې برابروي، خو د نړۍ د امنيت نظام له سختو ستونزو سره مخ دے، پاکستان دا خبره مهمه ګڼي چې د يو ملک خاوره دې د بل ملک خلاف د ترهه ګرۍ لپاره نۀ استعمالېږي ۔
خارجه وزير اووئيل چې د چين سره ملګرتيا د پاکستان د خارجه پاليسۍ مهمه برخه ده، د امريکې، سعودي عرب، ترکيې، جاپان، مصر، متحده عرب اماراتو او مليشيا سره اړيکې هم د پاکستان لپاره مهمې دي ۔
هغه زياته کړې چې د سعودي عرب او ترکيې سره د دفاعي همکارۍ د سيمې د امن او استحکام لپاره د پاکستان د عزم څرګندونه کوي، د دفاعي او تکنيکي صلاحيتونو زياتول، سرمايه کاري ته وده ورکول، د روزګار موقعې پيدا کول او د خلقو د ژوند معيار ښۀ کول د حکومت وړومبۍ ترجيحات دي ۔
