د خیبرپښتونخوا د قانون او بشري حقونو ډایرکټر جنرل غلام علي په پېښور کې د فری لانس خبریالې راني عندلیب او د هغې د دوو خویندو په ضد د تشدد په پېښه ژور افسوس ښودلې. نوموړي وویل چې دغه پېښه د افسوس وړ ده او دوی له متعلقه چارواکو سره په رابطه کې دي ترڅو د بشري حقونو د خوندي ساتلو او د متاثره کسانو ته د انصاف ورکولو لپاره ټول ممکن ګامونه واخلي.
نوموړي دغه څرګندونې په خپل دفتر کې د انساني حقوقو فعالانو سره کړي. په دی موقع د “بول اُٹھو تحریک” غړي هم موجود وو.
د “بول اُٹھو تحریک” يو غړي ډایرکټر جنرل ته معلومات ورکړل چې په دې وروستیو کې د پېښور په ښاري سیمو کې د ښځو په ضد د تاوتریخوالي څو پېښې رپورټ شوې دي، چې د درې خویندو – ناهید جهانګیر، سلمه جهانګیر، او راني عندلیب – په ضد د تشدد پېښه هم پکې شامله ده. دوی وویل چې دا پېښه د اندېښنې وړ ده، ځکه چې د عام سړک د پاسه په ښځو تشدد شوی دی.
د قانون او بشري حقونو ډایرکټر جنرل غلام علي دا هم وئيلي چې دوي دا پېښه په خپله څاري، او دا چې متاثره زنانؤ ته به پوره انصاف ورکړی کيږي.
