د وزيراعلیٰ سهيل آفريدي مشرۍ کښې د باجوړ او کرم ضلعو په صورتحال جدا جدا جرګې شوي، چې پکښې د دواړو ضلعو سياسي او ځائي مشرانو ګډون کړېدې، اعلاميې مطابق قبائلو مشرانو صوبائي حکومت ته امنيتي صورتحال لپاره د مکمل مرستو يقين دهاني ورکړې، په دې موقع پاک افغان تعلقاتو، د پولو صورتحال او قبائلي ضلعو په نور اهمو چارو غور شويدې، وزيراعلیٰ سهيل آفريدي د مسئلو حل لپاره د ضلع کرم دوره کولو اعلان هم کړېدې ۔
پيښور: د خېبر پښتونخوا وزير اعلیٰ باجوړ کښې د آپريشن په وخت په جزوي توګه متاثره شوي کورنو لپاره امدادي رقم کښې اضافه کړې او دغه امدادي رقم د يو لک شپيتۀ زره روپو نه تر پنځۀ لکه روپو پورې سيوا کړې شوې دې ، غونډه کښې شريکو مشرانو سيمه کښې د مستقل امن په غرض وزير اعلیٰ ته ګټور تجويزونه هم ورکړيدي ۔
وزير اعلیٰ سهيل آفريدي د ضم شوي ضلعو د فنډ او د وفاقي حکومت دغير سنجيدګۍ په حواله اووئيل چې د ضم کيدو په وخت وفاقي حکومت قبائيلي اولس سره دا لوظ کړې وو چې قبائيلي ضلعو ته به سالانه سل اربه روپۍ فنډ ورکولې شي، خو په تيرو اووۀ کالو کښې صرف يو سل اتۀ شپيتۀ اربه روپۍ قبائيلي ضلعو ته ورکړې شوي چې د مسائلو په وړاندې د نيشت برابر دي ۔
په دې موقع وزير اعلیٰ خېبرپښتونخوا سهيل آفريدي د ضلع کرم دمسئلو حل کولو په حواله د ضلع کرم د دورې اعلان هم کړې دې ۔
غونډې ته د وينا په وخت وزير اعلیٰ اووئيل چې قبائيلي سيمو کښې امن و امان قائمولو کښې سيکورټي فورسز ، پولس او د علاقې ځوانانو او مشرانو ډيرې قربانۍ ورکړي ، دا به تل ياد ساتلې شي ۔
