ګورنر فيصل کريم کنډي او داخله وزير محسن نقوي په مشرۍ کښې د اپيکس کميټۍ اجلاس شوې،اجلاس دوران صوبه کښې د ترهه ګرو خلاف کاروائيانې جاري ساتلو فيصله شوې، ګورنر فيصل کريم کنډي وئيلي چې د صوبې امن بحالۍ لپاره مونږ په يو پيج يو،ډير زر به د ترهه ګرۍ مخنيوي لپاره زمونږ اقدامات په نظر راشي،د ګورنر وينا ترمخه د صوبې معاملې په ښه شان چلولو هر ممکن کوشش به کولې شي،د ترقياتي منصوبو قرباني ورکولې شو، ولې د صوبې امنيت باندې به هيڅ سمجهوته نۀ کيږي ۔
پيښور: د خېبر پښتونخوا ګورنر فيصل کريم کنډي په مشرۍ کښې د صوبائي اپيکس کميټۍ غونډه په ګورنر هاوس پيښور کښي شوې ده ،غونډه کښې وفاقي داخله وزير محسن نقوي، کور کمانډر پيښور، چيف سيکرټري، آئي جي پوليس او نورو اعلیٰ سول او عسکري چارواکو ګډون کړې دې ۔
د غونډې په شروع کښې د امن و امان لپاره او ترهه ګرۍ خلاف جنګ کښې قربانۍ ورکوونکو شهيدانو ته د عقيدت پيرزونې وړاندې کړې شوې او د هغوي د بخښانې لپاره فاتځه خواني هم شوې ۔
غونډه کښې د صوبې د امنيتي صورتحال، د ترهه ګرۍ د مکمل خاتمي او پائيدار امن قيام لپاره د اقداماتو تفصيلي جاج اخستې شوې دې ۔
اجلاس کښې متعلقه ادارو ته د ترهه ګرۍ خلاف د مربوط او مؤثرو اقداماتو کولو هدايت کړې او فيصله ئې کړې چې د انټيلي جنس بيسډ عمليات به جاري ساتلې شي ۔
فورم د پوليس او سي ټي ډي د عملې صلاحيتونو زياتولو په ضرورت زور راوړې او دې ادارو ته د جديدو آلاتو، ضروري او بکتر بند ګاډو، مؤثره وسلې او ضروري نفري ورکولو فيصله ئې کړې ده ۔
غونډه کښې دا هم وئيلي شوي چې د ترهه ګرۍ خاتمه او په صوبه کښې د امن قيام د ټولو رياستي ادارو ګډه ذمه واري او اولنۍ ترجيح ده ۔
د اپيکس کميټۍ غونډه کښي د خېبر پښتونخوا د اولس د بنيادي مسئلو حل، تعليم، صحت، د ژوند معيار ښۀ کولو او د پسمانده او متاثره سيمو پرمختګ ته په خصوصي پاملرنې اتفاق هم شوی ۔
فورم وئيلي دي چې د بنيادي سهولتونو او سرکاري خدماتو د اولس تر دروازو رسولو لپاره به د مقامي ضرورتونو او د اولس د تجويزونو په رڼا کښې اقدامات کولې شي ۔
غونډې ته وينا کښې ګورنر فيصل کريم کنډي وئيلي چې د صوبې امن بحالۍ لپاره مونږ په يو پيج يو،ډير زر به د ترهه ګرۍ مخنيوي لپاره زمونږ اقدامات په نظر راشي ۔
د ګورنر وينا ترمخه د صوبې معاملې په ښه شان چلولو هر ممکن کوشش به کولې شي،د ترقياتي منصوبو قرباني ورکولې شو، ولې د صوبې امنيت باندې به هيڅ سمجهوته نۀ کيږي ۔
غونډي ته وينا کښې داخله وزير محسن نقوي وئيلي دي چې وفاقي حکومت به خېبر پښتونخوا او ملک نور برخو کښې په سيکيورټي هيڅ سمجهوته نه کوي ۔
هغۀ اووئيل چې پي ټي آئي حکومت د بار بار مطالبو باوجود د ترهه ګرۍ جنګ کښې د وفاق برخه جوړيدو نه انکاري وو ۔
داخله وزير مخکښې وئيلي چې د ترهه ګرۍ خلاف جنګ په بيان بازۍ نه ګټلي کيږي، دې لپاره عملي اقدامات پورته کول د وخت اهم ضرورت دې ۔
