د پاک فوج ترجمان ليفټيننټ جنرل احمد شريف چودهري وئيلي دي چې خېبرپښتونخوا کښې د ترهه ګرۍ پشا سياسي او مجرمانه جوړ جاړې دې، خېبرپښتونخوا کښې د ښۀ طرزِ حکمرانۍ خلا د پاک فوج ځوانان د خپلې وينې په ذريعه پورا کوي، پنجاب او سندھ کښې ترهه ګري ځکه نيشته چې هلتا حکومتونه دي، قانون نافذ کونکې ادارې کار کوي ، او سياسي جوړ جاړې هم نيشته، دا ئي هم وئيلي که يو يو سياسي ګوند يا يو کس دا ګنړي چې د هغۀ سياست د رياست نه بالاتر دې، نو داسې سوچ مونږ ته قبول نۀ دې ۔
پيښور: ډي جي آئي ايس پي آر ليفټننټ جنرل احمد شريف چودهري د پيښور کور هيډ کوارټرز کښې مهم پريس کانفرنس کړي ، ډي جي آئي ايس پي آر د سيکيورټۍ صورتحال،ترهه ګرو خلاف روان عملياتو په حواله ميډيا ته بريفنګ ورکړې، ليفټيننټ جنرل احمد شريف چودهري سيکيورټي چينلجونو او قامي سلامتيا متعلق معاملو باندې هم خبرې کړي ۔
د پاک فوج ترجمان اووئيل چې دوه زره څليريشتم نه پس خېبرپښتونخوا کښې خفيه اطلاعات باندې څوارلس زره ،څلور سوه،پنځه ديرش کاروائيانې شوي، چې پکښې اووه سوه، نهه شپيتۀ ترهه ګر وژلي شوي ۔
ليفټيننټ جنرل احمد شريف چودهري اووئيل چې دې دوران د پاک فوج دوه سوه، دوه اوويا افسران او ځوانان، يو سل څلويښت پوليس اهلکار او يو سل پنځه شپيتۀ عام وګړې شهيدان شويدي ۔
د پاک فوج ترجمان وينا وه چې دغه شميره د تير لس کالو مقابله کښې څښکال د ټولو زياته ده، د اے پي ايس حملې نه پس صوبې نه ترهه ګري ډير حده پورې ختم کړې شوې وه، ولې صوبه کښې د يوې مخصوص منصوبې لاندې ترهه ګر دوباره راوستي شوي ۔
هغه اووئيل چې خېبرپښتونخوا کښې د ښۀ طرزِ حکمرانۍ خلا د پاک فوج ځوانان د خپلې وينې په ذريعه پورا کوي، صوبه کښې د ترهه ګرۍ پشا سياسي او مجرمانه ګت جوړ جاړې دې ۔
ترجمان اووئيل چې ټول سياستدانان قابلِ احترام دي ، ولې که يو کس دا ګنړي چې د هغۀ سياست د رياست نه بالاتر دې، نو داسې سوچ مونږ ته قبول نۀ دې ۔
هغه مخکښې اووئيل چې د ترهه ګرو سهولت کاري چې هر څوک کوي زمکه به پرې تنګولې شي،او دا چې نورو صوبو کښې ترهه ګري ځکه نيشته چې دغه صوبو کښې حکومتونه دي، قانون نافذ کونکې ادارې کار کوي ، او سياسي جوړ جاړې هم نيشته ۔
ډي جي آئي ايس پي آر د ترهه ګرۍ نۀ ختميدو وجوهات هم بيان کړې، وائي چې په نيشنل ايکشن پلان عمل نۀ کول، ترهه ګرۍ په معامله سياست کول او قام په دې سياست کښې شاملول، بهارت د افغانستان زمکه د ترهه ګرۍ د بيس کيمپ په توګه استعمالول، افغانستان کښې ترهه ګرو ته د جديد وسلې ټهکانو فراهمي او ترهه ګرو ته په مقامي سطح پناه ورکول او د دوي جرائم پيشه خلقو سره جوړ جاړې ۔
هغه مخکښې اووئيل چې کله هم ترهه ګرو خلاف کاروائي کوؤ نو د دوي پشت پناهۍ لپاره مختلف قسمه سياسي او مقامي آوازونه پورته کيږي ۔
ليفټيننټ جنرل احمد شريف اووئيل چې امريکې په افغانستان کښې د اووه اعشاريه دوه ارب ډالر وسله پريښودې،دغه وسله ترهه ګرو ته په لاس ورغلې او افغان زمکې نه پاکستان خلاف استعماليږي ۔
د پاک فوج ترجمان خبردارې ورکړې چې سهولت کار دې ټول خارجي ترهه ګر رياست ته اوسپاري، او رياست سره دې په شريکه ترهه ګرو خلاف اودريږي، که دوي داسې نۀ کوي نو دغه سهولت کار دې د پاک فوج ايکش ته ځان تيار کړي،ترجمان سوال کړې چې نن دا بيانيه د کوم ځائې نه راغلې چې افغان کډوال دې خپل وطن ته واپسي نۀ کوي ۔
