د پيښور هائيکورټ حکم او اليکشن کميشن آف پاکستان هداياتو نه پس خېبرپښتونخوا اسمبلۍ کښې مخصوص نشستونو باندې منتخب پنځه ويشت اراکينو ګورنر هاؤس کښې حلف پورته کړې، ګورنر فيصل کريم کنډي د دغه نوې اراکين نه حلف اخستې دې ۔
پيښور: مخصوص نشستونو باندې منتخب شوي پنځه ويشت اراکينو د حلف پورته کولو دستوره د پيښور ګورنر هاؤس کښې شوې چې پکښې وفاقي وزير امير مقام، دصوبائي اسمبلۍ کښې د مخالفو ډلو مشر ډاکټر عباد الله، د جميعت علما اسلام، عوامي نيشنل پارټۍ، مسلم ليګ ن، پيپلز پارټۍ او پاکستان تحريک انصاف پارليمنټيريئنز غړو پشمول نور متعلقه چارواکو ګڼ شمير کښې ګډون کړېدې ۔
حلف اخستونکي اراکينو کښې د جے يو آئي نهه، د مسلم ليګ اتۀ، د پيپلز پارټۍ پنځه، د عوامي نيشنل پارټۍ دوه او د پي ټي آئي پي يو رکن د صوبائي اسمبلۍ رکن په حيث حلف پورته کړيدې ۔
پنځه ويشت مخصوص نشستونو کښې يويشت زنانؤ او د اقليت څلور اراکين شامل دي، د جے يو آئي اووه زنانؤ، او دوه اقليتي غړو، د مسلم ليګ ن اووه زنانؤ او يو اقليت رکن، د پيپلز پارټۍ څلور زنانؤ او يو اقليت غړي، د اے اين پي دوه او پي ټي آئي پي يو زنانه رکن حلف اخستونکي اراکينو کښې شامل دي ۔
د يادونې وړ ده چې د دغه اراکينو حلف بردارۍ لپاره د خېبرپښتونخوا اسمبلۍ غونډۀ نن رابللې شوې وه، ولې د کورم نشاندهۍ باندې د مخصوص نشستونو اراکينو حلف نۀ وو پورته کړي، چې لوجې ئې بيا اپوزيشن جماعتونو پيښور هائيکورټ کښې درخواست جمع کړې وو ، په کوم چې عدالت د حلف پورته کولو لپاره ګورنر خېبر پښتونخوا نامزد کړې وو ۔
