د باجوړ په خار تحصيل کښې د ترهه ګرو په ډزو کښې شهيد شوې د پاک فوج ميجر عديل زمان جنازه پيښور ګريژن کښې ادا شوې ، آئي ايس پي آر وئيلي چې جنازه کښې چيف آف ډيفنس فورسز عاصم منير، داخله وزير محسن نقوي، کورکمانډر پيښور او نورو مشرانو ګڼ شمير کښې ګډون کړېدې ، سي ډي ايف سيد عاصم منير د شهيد قربانۍ ته خراج تحسين وړاندې کړې او وئيلي دي چې د پاک فوج شهيدان د ټول قام فخر دي ، د دوي قربانۍ به هميشه ياد ساتلې شي ، د شهيد جناه خپل آبائي کلي ډيره اسماعيل خان کښې هم ادا شوې او فوجي اعزاز سره خاورو ته سپارلې شويدې ۔
پيښور: د پاک فوج اطلاعاتو شعبې له لوري جاري بيان کښې وئيلي شوي چې د شهيد ميجر عديل زمان جنازه د پيښور ګريژن کښې ادا شوې،چې پکښې چيف آف ډيفنس فورسز عاصم منير، داخله وزير محسن نقوي، کورکمانډر پيښور ،د پاک فوج نورو افسرانو او د شهيد خپل خپلوانو شرکت کړيدې ۔
آئي ايس پي آر ترمخه په دې موقع سي ډې ايف سيد عاصم منير د شهيد قربانۍ ته خراج تحسين وړاندې کړې او وئيلي دي چې د پاک فوج شهيدان د ټول قام فخر دي ، د دوي قربانۍ به هميشه ياد ساتلې شي ۔
د چيف آف ډېفنس وينا وه چې د پاکستان وسله افواج ملک نه ترهه ګري ختمولو لپاره پرعزم دي، او د ځوانانو قربانۍ ترهه ګر خلاف جنګ کښې زمونږ عزم نور مضبوطوي ۔
دې وروستو چيف آف ډيفنس د پيښور سي ايم ايچ دوره هم کړې او د ژوبل سيکيورټي اهلکارانو عيادت سره سره د هغوي حوصلې ئې هم ستائلي دي ۔
بلخوا د شهيد ميجر عديل زمان سدوزئي جنازه ډيره اسماعيل خان کښې هم ادا شوې، چې پکښې د شهيد خپل خپلوانو، عسکري چارواکو،سول سوسائټۍ او نور عام خلقو ګڼ شمير کښې ګډون کړېدې ۔
شهيد ميجر عديل فوجي اعزاز سره خاورو ته سپارلې شويدې، جنازه کښې شرکت کونکي کسانو د ميجر عديل قربانۍ ته خراج تحسين وړاندې کړېدې ۔
