د سوات قامي جرګې فوجي آپريشن مسترد کړې او غوښتنه ئې کړې چې پوليس ته دې اختيارات ورکړې شي او حکومت دې د ترهه ګرۍ په اړه خپلې پاليسيانې بدلې کړي ۔
سوات پريس کلب کښې قامي جرګې کميټۍ يوه مهمه غونډه شوې چې پکښې د جرګې مهمو غړو مختيار خان يوسف زئي، خورشيد خان، زاهد خان، احمد شاه، عرفان چټان او د نورو سياسي جماعتونو غړو او د سوات اولسي مشرانو ګډون کړې دې ۔
جرګې د تفصيلي خبرو نه پس خپله اعلاميه جاري کړې، اعلاميې مطابق د سوات پشمول په خېبر پختونخوا کښې هيڅ قسمه فوجي آپريشن ته تيار نۀ يو، که چرې حکومت دلته د فوجي آپريشن اراده لري نو مونږ به ئې مزاحمت کوؤ ۔
هغوي زياته کړه چې د خېبرپختونخوا په مختلفو سيمو او سوات کښې د امن و امان صورتحال خراب دې، د سوات په غرونو کښې د ترهه ګرو موجودګۍ اطلاعات دي ۔
جرګې اعلاميې مطابق حکومت دې د ترهه ګرۍ په اړه خپله پاليسي بدله کړي ، پښتانۀ امن غواړي او د قانون حکمرانۍ لپاره مونږ سره کلک ولاړ دي ۔
د سوات قامي جرګې اعلاميه کښې دا هم وئيلي شوي چې خېبر پختونخوا پوليس ته دې اختيارات زيات کړې شي،او ورله دي د ډز کولو اجازت ورکړې شي ۔
