پاکستان فيصله کُن ون ډے ميچ کښې څلور وکټو باندې آسټريليا ته شکست ورکړې ، او درې ميچونو سيريز ئې دوي يو سره په خپل نوم کړيدې، د ميلمه ټيم د يوسل، اتۀ پنځوس رنز هدف قامي ټيم دوه څلويښتم اوور کښې شپږ وکټو په زيان پورا کړې او ميچ ئې ګټلې دې ۔
د لاهور قذافي سټيډيم کښې لوبيدلې دريم او فيصله کن ون ډے ميچ کښې آسټريليا اول بېټنګ کړې وو او دوه څلويښت اوورز کښې يو سل ، اووۀ پنځوس رنز باندې ټول ټيم آؤټ شوې وو ۔
ميلمه ټيم طرف نه ټولو نه زيات کپتان جوش انګلس پنځه اوويا رنز جوړ کړي، مارنوس لبوشېن، او ايلکس کيرے نورلس، نورلس رنز باندې آؤټ شويدي ۔
پاکستان طرف نه کپتان شاهين شاه آفريدي يو ځل بيا زبردست بولنګ کړې او درې وکټې ئې په خپل نوم کړېدي ۔
شاداب خان او ابرار احمد دوه، دوه او حارث رؤف يو وکټ اخستې دې ، د پاکستان مقرره هدف دوه څلويښتم اوور کښې شپږ وکټو په زيان پورا کړې او ميچ ګټلو سره سيريز ئې هم دوه يو سره په خپل نوم کړېدې ۔
پاکستان طرف نه تولو نه زيات بابراعظم څلويښت،معاذ صداقت اووۀ ويشت او سلمان آغا پنځلس رنز جوړ کړې وو، شاداب خان په نهه ويشت او عبدالصمد په اتلس رنز ناټ آؤټ پاتې شويدي ۔
شاندار بولنګ باندې د قامي ټيم کپتان شاهين شاه آفريدي د ميچ او آل راؤنډ کاکردګۍ باندې عرفات منهاس د سيريز بهترين لوبغاړي ګرځولي شويدي ۔
دې نه وړاندې د سيريز دوئم ميچ کښې ميلمه ټيم آسټريليا په يو څلويښت رنز قامي ټيم ته شکست ورکړې وو او يو، يو سره ئې سيريز برابر کړې وو، د سيريز اولنې ميچ پنډۍ کښې لوبيدلې وو ، چرته چې قامي ټيم په پنځه وکټو آسټريليا ته شکست ورکړې وو ۔
