د خېبر پښتونخوا ټول سياسي جماعتونو د وفاقي حکومت نه د صوبې حقوق ادا کولو مطالبه کړې ده، دې لړ کښې ګورنر فيصل کريم کنډي، وزیراعلیٰ سهيل آفريدي او صوبائي اسمبلۍ کښې اپوزيشن ليډر ډاکټر عباد شريکه خبري غونډه کړې او دغه مطالبه ئې کړېده ۔
د خېبر پښتونخوا مسئلو حل لپاره صوبائي حکومت، ګورنر او اپوزيشن جماعتونه په يو پيج شوي او د وفاقي حکومت نه ئې د صوبې حقوق ادا کولو مطالبه کړې ده ۔
پيښور کښې شريکې خبري غونډې ته وينا کښې ګورنر فيصل کريم کنډې پښتنه اوکړه چې آيا د خيبر پښتونخوا ګناه دا ده چې صوبه وفاق ته بجلي او ګيس ورکوي ؟
فيصل کريم کنډي اووئيل چې مونږ رياست ته ارزانه بجلي او ګيس ورکوؤ، مائنز خيبر پښتونخوا کښې دي، چې صوبې د اوبو شيئرز ميلاؤ شي نو مونږ ته به صوبې لپاره د غنمو اخستو ضرورت هم نۀ وي ۔
د ګورنر وينا وه چ زمونږ صوبې سره چې زياتې کيږې نو مونږ به د صوبې اولس سره کلک ولاړ يو، مونږ درخواست کوؤ، بائد وفاق د دې معاملې نوټس واخلي ۔
فيصل کريم کنډي اووئيل چې مونږ د ترهه ګرۍ خلاف جنګ کوؤ، د پوليس او آرمي د ځوانانو جنازې اوچتوؤ، د صوبې د پاره يو ځائې ناستې ته هميشه تيار يم، کۀ وفاقي صوبې ته خپل حق نۀ ورکوي، نو دا به ډير زياتې وي ۔
په دې موقع وزیراعلیٰ سهيل آفريدي د وفاقي حکومت د صوبې مختلفو منصوبو کښې رويه غير قانوني او غير آئيني ګرځولې او وئيلي دي چې صوبې ته اوړۀ نۀ ورکولې کيږي، مونږ رياست ته ارزان ګيس او ارزانه بجلي ورکوؤ، ولې زمونږ سي اين جي سټيشنز بند کړې شويدي ۔
سهيل آفريدي اووئيل چې وزيراعظم ته مې د سي اين جي سټيشنز بنديدو په معامله خط ليکلې او ورته مې وئيلي چې سي اين جي سټيشنز بنديدو سره د زرګاؤ مزدوران روزګار خرابيدو انديښنه پيدا شويده ۔
وزیراعلیٰ اووئيل چې زما د ټولو نه يوه مطالبه ده چې غير قانوني اقدامات کښې دې د وفاقي ملګرتيار نۀ کوي، مونږ صوبه کښې د وفاق کارونو لپاره بريج فنانسنګ هم کوؤ ۔
هغۀ زياته کړې چې خېبر پښتونخوا کښې د ګيس بندش غير قانوني اقدام دې، وفاقي حکومت د قبائلي ضلعو دولس اربه روپۍ هم کټ کړې دي ۔
شريکې خبري غونډې ته وينا کښې اپوزيشن ليډر ډاکټر عباد اووئيل چې وفاقي حکومت کار کوي ،ولې مسئلې هم توجو غواړي ،د صوبې ټول جماعتونه رايوځائې کولو باندې هغه د سپيکر شکريه هم ادا کړې ده ۔
