ټي ټوينټي ورلډ کپ کښې پاکستان شاندار آغاز کړې، د ميګا ايونټ اولني ميچ کښې سنسني خيز مقابلې نه پس قامي ټيم په درې وکټو نيدرلينډز ته شکست ورکړېدې، د نيدرلينډز يوسل، اتۀ څلويښت رنز هدف قامي ټيم آخري اوور کښې اووۀ وکټو په زيان پورا کړې، فهيم اشرف جارحانه بيټنګ کړې او د ميچ ګټه کښې ئې اهم کردار ادا کړيدې ، فهيم اشرف ته د ميچ بهترين لوبغاړي اعزاز ورکړې شويدې ۔
د سري لنکا په کولمبو کرکټ سټيډېم کښې لوبيدلې ميچ کښې پاکستان ټاس ګټلو نه پس اول په خپله د فيلډنګ فيصله کړې وه ۔
د نيدرلينډز ټيم آخري اوور کښې يو سل، اووۀ څلويښت رنز باندې آؤټ شوې وو، چې پکښې ټولو نه زيات سکاټ ايډورډز اووۀ ديرش او بېس ډي ليډے ديرش رنز جوړ کړې وو ۔
پاکستان طرف سلمان مرزا درې، محمد نواز، صائم ايوب او ابراراحمد دوه، دوه او شاهين شاه آفريدي يو وکټ په خپل نوم کړې وه ۔
د مقرره هدف په تعاقب کښې قامي ټيم اوپنرز ښه بيټنګ کړې وو ، ولې بيا د ټيم وکټې وقفې وقفې سره پريوتې ، چې ورسره په پاکستان دباؤ سيوا شوې وو ۔
فهيم اشرف جارحانه او ذمه وارانه بيټنګ کړې او نهه ويشت رنز باندې ناټ آؤت پاتې کيدو سره ئې د ټيم ګټه کښې اهم کردار ادا کړېدې ۔
صاحبزاده فرحان اووه څلويښت، صائم ايوب څليريشت، بابراعظم پنځلس، سلمان آغا دولس، شاداب خان اتۀ، محمد نواز شپږ او عثمان خان په صفر آؤټ شوي وو ۔
شاندار او جارحانه بيټنګ باندې فهيم اشرف د ميچ بهترين لوبغاړي ګرځولې شويدې، ميګا ايونټ کښې به د پاکستان دوئم ميچ په لسمه فرورۍ امريکې خلاف کولمبو سټيډيم کښې لوبيږي ۔
