د شمالي وزیرستان میرعلي په هرمز سیمه کښې مبينه ډرون حمله کښې شهیدان شوي د څلورو ماشومانو پحق رسيدو په معامله اته ورځو راهسې روان پرلت د کامیاب مذاکراتو وروستو ختم کړې شوې دې ۔
د میرعلي فوجي کیمپ مخې ته روان پرلت کښې د سیاسی او سماجی تنظیمونو مشرانو او کارکوونکو په ګدون ګڼ شمېر کښې خلق شریک وو. تېره ورځ میران شاه کښې د فوجي، سویلین چارواکو او دغه شان د پرلت منتظمینو او اتمانزئي مشرانو مهمه جرګه وشوه چې پکښې فریقېن د پرلت په ختمولو متفق شول ۔
د پرلت مشرانو خيبر نیوز ته وئيلي چې فوجي او سویلین چارواکو ئې مطالبات منلي او ډاډ ئې ورکړې په شمالي وزیرستان کښې د مستقل امن قیام لپاره به سنجيده ګامونه پورته کوي ۔
مشرانو دا هم زیاته کړې چې د مطالباتو په اړه دواړه طرفونو په باقاعده ډول په یو سټامپ پیپر لاس ليک هم کړې دې ۔
یاده دې وي چې اته ورځې وړاندې د میرعلي په هرمز سیمه کښې د مبينه ډرون حملې په نتیجه کښې د يو کور څلور ماشومان شهيدان او د زنانه په ګډون درې کسان ژوبل شوي وو چې د هغی وروستو اولس د ماشومانو مړو سره د میرعلي فوجي کیمپ مخې ته پرلت ورکړې وو ۔
