بنګله ديش په خپله فيصله کلک اودريدلې او د ټي ټوينټي ورلډ کپ د بائيکاټ اعلان ئې کړېدې، بنګله ديش کرکټ بورډ وئيلي چې خپل ټيم به ورلډ کپ لپاره بهارت ته نۀ ليږي، د لوبو مشير آصف نذرل مطابق د معاملې حل لپاره به آئي سي سي ته يو بل خط هم ليکلې شي ۔
ډهاکه کښې د بنګله ديش کرکټ بورډ، قامي لوبغاړو او لوبو مشير ترمينځ اهم اجلاس نه پس اعلان شوې چې د بنګله ديش کرکټ ټيم به ټي ټوينټي ميچونو لپاره بهارت نۀ ليږلې کيږي ۔
خبري غونډې ته وينا کښې د بنګله ديش کرکټ بورډ صدر امين الاسلام اووئيل چې بي سي بي به دې حوالې سره دوباره آئي سي سي سره رابطه کوي، څليريشت ګهنټې مهلت مناسب نۀ دې، يو نړيواله اداره په مونږ داسې دباؤ نۀ شي اچولې ۔
هغه اووئيل کۀ بنګله ديش د ورلډ کپ نه بهر شو نو شل کروړه کتونکي به ورلډ کپ نه محرومه شي او دا به د آئي سي سي لوئې مالي زيان وي ۔
په دې موقع د بنګله ديش د لوبو مشير آصف نذرل اووئيل چې مونږ بهارت کښې ميچونه لوبولو ته بالکل تيار نۀ يو، او غواړو چې ټي ټوينټي ورلډ کښې زمونږ ميچز سري لنکا ته منتقل کړې شي ۔
آصف نذرل طمع څرګند کړې چې آئي سي سي به بنګله ديش ټيم ته په سري لنکا کښې د ميچز لوبولو اجازت ورکوي ، زمونږ دا فيصله د بنګله ديش حکومت کړې ده او دا حتمي ده ۔
