قائداعظم يونيورسټۍ اسلام آباد کښې د پښتون سټوډنس کونسل لخوا “ګلونه او رنګونه” عنوان لاندې د پښتو ژبې درنه او خوندوره مشاعره شويده ۔
اسلام آباد: (سردار يوسفزي) قائد اعظم يونيورسټۍ اسلام آباد کښې تيره ورځ ترسره شوې مشاعرې صدارت د پښتنو قامي شاعر رحمت شاه سائل کړې وو ۔
په دې موقع نومياله شاعر او اسلاميه کالج پوهنتون پېښور کښې د پښتو څانګې پخوانې چيئرمېن پروفېسر ډاکټر اباسين يوسفزي او نومياله شاعر فضل سبحان عابد مشران مېلمانه وو ـ
د پشتو ادبي سوسائټۍ اسلام آباد باني او پخوانے چيئرمېن م ر شفق، او پروفېسر ډاکټر حنيف خليل اعزازي مېلمانه وو،د نظامت چارې سردار يوسفزي ترسره کړې وې ـ
په دې موقع شاعرانو ته د کتابونو او ګلونو ډالۍ ورکړې شوې، صدر محفل، مشرانو او اعزازي مېلمنو خپلو خبرو کښې د پښتو ادب په اهميت او معاشره کښې د شاعر په کردار خبرې اوکړې ـ
قائداعظم يونيورسټۍ اسلام آباد کښې د پښتون سټوډنټس کونسل ځوانان وخت په وخت ادبي کلتوري دستورې تابيا کوي چې داشان ځوان کول د جديد دور چپو کښې خپل ادب کلتور او رواياتو سره تړلې پاتې شي ـ
دې دستورو کښې د پنډۍ اسلام آباد شاعرانو اديبانو او په خصوصي توګه د پشتو ادبي سوسائټۍ اسلام آباد يو مهم کردار دې ـ
د نن نه څلوېښت کاله وړاندې جوړ شوې د دې تنظيم برکت وو چې دلته د وخت تېريدو سره سره مختلف قسم ادبي کلتوري ټولنې جوړې شوې او د خپلو خپلو چوکاټونو دننه ئې د پښتو ادب او ثقافت وده کښې خپل کردار ادا کړو او ادا کوي ،دغه وجه ده چې نن د مارګلې لمن د دې هلو ځلو په برکت پښتونخوا سره يو شان په نظر راځي ـ
د اسلام آباد اعلى تعليمي ادارو طالب علمان هم لګيا دي د دغه تنظيمونو په مرسته د ادب او کلتور وده کښې خپل کردار ادا کوي ـ
د پروګرام مشر منتظم احمد خان خپلواک د مېلمنو شکريه ادا کړه او د پښتون کونسل په غېر نصابي او ادبي کلتوري سرګرمو ئې رڼا واچوله، احمد خان خپلواک اېم فل سکالر او مورنۍ ژبې ليونې مئين دې ،دلته دې دستورو تابيا کولو کښې ئې بنيادي کردار دې ، دې سره سره هغه په قام او وطن مئين شاعر هم دې ـ
د پښتون کونسل چېٸرمېن انعام ترين په پښتو او قاموالۍ مئين سنجيده ځوان دے ـ هغۀ د راغلي مېلمنو هرکلې اوکړو او د راغلي شاعرانو ئې شکريه ادا کړه، او وې وئيل چې د دې نامتو شخصياتو راتګ سره د پښتون کونسل ځوانان د ادب کلتور خدمت ته نور تازه او چمتو کيږي ـ
دوي اووئيل چې دلته تعليمي ادارو کښې پښتانه طالب علمان تعليم سره سره ادبي کلتوري هلې ځلې په ډېر تسلسل کوي نو د دوي ډاډګيرنه په مونږ لازم ده او مونږ تاسو سره په دې قامي خدمت کښې کلک ولاړ يو ـ
صدر محفل رحمت شاه سائل او مشر مېلمه پروفېسر ډاکټر اباسين يوسفزي اووئيل چې د دې مشاعرې انفراديت دا وو چې ټولو شاعرانو په خپله خوښه ښه زيات کلامونه وړاندې کړل، نۀ ورپسې سټېج سېکرټري آواز کړې او نۀ اورېدونکي يو لحظې دپاره مړاوې شوي ـ
دوي اووئيل چې دا ډېره کاميابه مشاعره وه چې راغلي خلک تر آخره ناست او چټک پاتې شو ، دوي اووئيل چې دا لړۍ دغه رنګ جاري وساتلې شي ۔
مشاعره کښې رحمت شاه سائل، پروفېسر ډاکټر اباسين يوسفزي، فضل سبحان عابد، م ر شفق، پروفېسر ډاکټر حنيف خليل،پروفېسر ډاکټر شجاع الملک،پروفېسر ظاهر شاه ظاهر ،حيات سواتي، احمد خان خپلواک،افنان مروت او نديم ټکر خپل خپل کلامونه وړاندے کړل ۔
په دې موقع پښتنو زلمو او پېغلو ګڼ شمېر کښې “ګلونه او رنګونه” نومې ادبي دستوره کښې ګډون اوکړو او پښتون کونسل د ځوانانو ادبي هلو ځلو ستائنه ئې هم اوکړه ۔
