خېبر پښتونخوا کښې تیر دووه ورځو دوران بارانونو او سيلابونو لوجې ديارلس کسان پحق رسيدلي او درې ژوبل شويدي،بارانونو او سيلابونو له کبله نورلس کورونو ته زيان هم رسيدلې ،بلخوا پي ډي ايم اے د مردان کلپاڼې خوړ کښې د ناڅاپي سيلاب راتلو پحقله ضلعی انتظامیې ته هائي الرټ جاري کړيدي ۔
پيښور: پي ډي ايم اے خېبرپښتونخوا لخوا جاري شوې رپورټ ترمخه صوبه کښې تير دوؤ ورځو دوران د تيز بارانونو او سيلابونو لوجې په مختلفو پيښو کښې ديارلس کسان پحق رسيدلي او درې نور ژوبل شويدي ۔
رپورټ مطابق د بارانونو او سيلابونو لوجې په مجموعي توګه نورلس کورونو ته زيان رسيدلې په کوم کښې چې اوولس کورونو په جزوي توګه زيان مند شوي او دوه کورونه په مکمله توګه تباه شويدي ۔
پي ډي ايم اے رپورټ ترمخه دا بدې پيښې سوات، باجوړ، بونير، تورغر، مردان، مالاکنډ، کوهستان، چترال او شانګله کښې مخې ته راغلي دي ۔
پي ډي ايم اے لخوا متعلقه ضلعي انتظاميو ته د متاثره خاندانونو سره په فوري توګه د امداد کولو او ژوبل کسانو ته د غوره طبي سهولياتو ورکولو هدايات هم جاري کړيدي ۔
پي ډي ايم اے رپورټ ترمخه د بارانونو دا سلسله به د روانې مياشتې پنځه ويشتمې جولائي پوري جاري وي او په دې لړ کې ټولو ضلعي انتظاميو ته د وړاندې نه د چمتو اوسيدو او کوټلي ګامونه پورته کولو مراسله جاري کړے شويده ۔
